Bashkimi Evropian ka njoftuar se të enjten, duke filluar nga ora 9 e mëngjesit, do të nisin takimet bilaterale me Kurtin dhe Vuçiqin, për të pasuar me takimin trepalësh. Në Kosovë, disa kanë pritshmëri të vogla për rezultatet e këtij takimi, e disa sugjerojnë që zbatimi i marrëveshjes të shkojë me rend, nga pika e parë deri te e fundit.
Nikoqirët e dialogut mes Kosovës dhe Serbisë, të martën kanë njoftuar për agjendën e takimit të nivelit të lartë, që do të zhvillohet me 14 shtator në Bruksel.
Nga Bashkimi Evropian kanë bërë të ditur se me fillim nga ora 09:00 Borrell e Lajçak do të takojnë ndaras kryeministrin e Kosovës, Albin Kurti dhe presidentin e Serbisë, Aleksandër Vuçiq, dhe më pas pritet ta zhvillojnë edhe takimin e përbashkët ose trepalësh.
Për takimin e së enjtes, kohëve të fundit është vërejtur një angazhim i madh i diplomacisë, si evropiane ashtu edhe amerikane.
Por, pavarësisht këtij angazhimi, njohësi i çështjeve politike, Fidan Ukaj thotë se nuk pret diçka konkrete nga ky takim, për shkak të qëndrimit të palëve.
Njëra nga temat që pritet të diskutohet në këtë takim është thënë se është edhe çështja e planit të sekuencimit, për të cilin njohësi i procesit të dialogut Gazmir Raci, thotë se zbatimi i marrëveshjes duhet të filloi nga pika e parë.
Ndërsa, deputeti i lëvizjes Vetëvendosje, Armend Muja, në emisionin ResPublika në tëvë1 ka thënë se po presin nga BE që të ketë një plan më të balancuar të sekuencimit.
Autor: Valmir Gallopeni
