I njëjti sipas përfaqësuesve të këtyre institucioneve do të ndikojë që të ketë shtim të kapaciteteve për trajtimin e të burgosurve me çrregullime mendore, po edhe atyre me sëmundje kronike.
Ali Gashi, zëvendësues i drejtorit të përgjithshëm të Shërbimit Korrektues të Kosovës, në emisionin “De Jure” tha se me funksionalizimin e këtij projekti do të shtohen kapacitetet për 82 vende.
“Do ta realizojmë një projekt që do të kemi, do të rrisim kapacitetin deri në 82 vende për personat me nevoja të veçanta, pleqve, personave me sëmundje kronike, çrregullime psikiatrike dhe me sëmundje të varësisë, sepse kemi edhe një numër të konsiderueshëm të personave të privuar nga liria që janë vartës të lëndëve narkotike. Nëse i referohemi vetëm Qendrës Korrektuese të Dubravës, afro 150 persona të privuar nga liria janë në varësinë e drogave, kështu që ky institucion që po besojmë që do ta realizojmë brenda vitit 2022, do të na zbusë, jo eliminojë, por do të na zbusë vështirësitë që i kemi si Shërbim Korrektues i Kosovës”, tha ai në emisionin “De Jure” në Tëvë1.
Alban Muriqi, këshilltar i ministres së Drejtësisë, tha se me këtë projekt nuk do të zgjidhet i gjithë problemi i trajtimit të burgosurve me çrregullime mendore, por deri në një masë do të ofrohen shërbime më kualitative.
“Normalisht me këtë nuk mund ta zgjedhim tërë problemin e gjithë sistemit, mirëpo një numër i mirë i të rinjve do të mund të ofrohen, do të mund t’i gëzojnë këto shërbime, shërbime më profesionale, më të mira, shërbime në komunitet dhe në hapësira të caktuara. Aty do të punësohet si e thash personeli shëndetësor kryesisht, mirëpo do të ketë edhe gardianë për shkaqe sigurie”, tha ai në emisionin “De Jure” në Tëvë1.
Në anën tjetër, drejtoresha e burgut të Dubravës, Zyrafete Imeraj, tha se me këtë projekt do të kenë mundësi që t’u ofrojnë shërbime shëndetësore më dinjitoze të privuarve nga liria.
“Vërtetë është sfidë, sidomos me ata të burgosur që janë me probleme të shëndetit mendor rëndë, mirëpo me hapjen e kësaj njësie, presim dhe shpresojmë që do të trajtohen në mënyrë të dinjitetshme dhe do të marrin trajtimin e nevojshëm psikiatrik shëndetësor të mjaftueshëm që parashihet në këtë njësi. Sigurisht presim rezultate dhe rehabilitimin e tyre dhe kthimin në shoqëri më të përshtatshëm për rrethin dhe komunitetin”, tha ajo në emisionin “De Jure” në Tëvë1.
Për më shumë ndiqeni hulumtimin “Shërbimet shëndetësore në burgje”, i cili po transmetohet në “Tëvë1” dhe “Betimi për Drejtësi.
