Sot dhe nesër, do të luhen ndeshje interesante në kuadër të xhiros së 23-të në Superligën e Kosovës në basketboll.
Sfida kryesore e kësaj xhiroje, do të zhvillohet mes dy skuadrave rivale në basketbollin e Kosovës, Sigal Prishtinës dhe Trepçës. Këto dy skuadra së fundi u përballën në Gjakovë në finalen e Kupës, ku fituan mitrovicasit. ‘Xehetarët’ janë liderë me 20 fitore e dy humbje, derisa bardhekaltrit renditen në vendin e tretë me 14 fitore e tetë humbje. Mitrovicasit kanë 15 fitore radhazi në elitë, derisa kanë fituar tri takimet në Superligë ndaj prishtinasve në këtë edicion, që kërkojnë titullin e kampionit. Trepça pritet të udhëtoj e kompletuar, ndërsa bardhekaltrit do të jen në mungesën e Dardan Berishës. Kjo ndeshje luhet në Prishtinë dhe nis në orën 19:00.
Të mërkurën, në të njëjtën kohë, në një sfidë tjetër interesante do të përballen Peja dhe Proton Cable Prizreni. Pejanët janë në vendin e dytë me 16 fitore e gjashtë humbje, kurse prizrenasit pas fitores ndaj Sigal Prishtinës janë të motivuar dhe kërkojnë fitoren e radhës dhe plasmanin në playoff, derisa renditen në vendin e shtatë me shtatë fitore e 15 humbje.
Të enjten, do ë luhen dy ndeshjet tjera të kësaj xhiroje, që gjithashtu nisin në orën 19:00.
Istogu që po paraqitet vetëm me vendorë do të ndeshet me Golden Eagle Yllin, ku therandasit shihen favoritë. Istogasit kanë vetëm një fitore e 21 humbje, derisa Ylli numëron 13 fitore e nëntë humbje.
Dueli tjetër i së enjtes, është ai mes Vëllaznimit dhe Bashkimit, që është shumë i vlefshëm, pasi kuqezinjtë janë në vendin e pestë me nëntë fitore e 13 humbje, kurse prizrenasit në vendin e gjashtë me tetë fitore e 14 humbje.
