Kryeqendra kosovare deri në fund të këtij viti pritet të bëhet me shkollë për kodim.
Për prishtinasit mbi moshën 18 vjeçare, aftësimi me shkathtësitë për kodim do të jetë krejtësisht falas.
Kampusi me rrjetin “shkolla 42”, për herë të parë gjen zbatim si në Kosovë, edhe në Ballkanin Perëndimor.
Nga Komuna e Prishtinës kanë dhënë detaje për nevojën e një projekti të tillë.
“Nevojës së madhe të Kosovës për programerë të shkathët në treg duhet t’i përgjigjemi me zgjidhje konkrete, të shpejta dhe të qëndrueshme. Kushdo duhet të ketë mundësinë të provojë kodimin, pavarësisht moshës, përvojës dhe kushteve financiare. Nuk mjafton që lënda e kodimit të jetë lëndë zgjedhore në shkolla. Koncepti i rrjetit të “shkollave 42” do të i përgjigjet saktësisht kësaj nevoje”, tha nënkryetarja e Prishtinës, Donjeta Sahatçiu.
Kjo shkollë e kodimit është e mirëseardhur edhe për drejtori në Institutit Ed- Guard, Rinor Qehaja.
Sipas tij ky projekt do të ishte mirë të përfshihej edhe në komunat tjera.
“Prezantimi i lëndëve mësimore, ose shkollave të veçanta për kodim dhe përdorim të teknologjisë informative janë super të mirëseardhura, pasi që ndikojnë në të zhvilluarit logjik dhe mendimit kritik të nxënësve tanë. Shpresoj shumë që e njëjta të na institucionalizohet tutje si pjesë e korrikuliumit”, tha Rinor Qehaja, drejtor në Institutin “Ed – Guard”.
“Shkolla 42” është shtëpia e kampuseve më të mira të teknologjisë së informacionit në botë.
Nga 2013-ta ky program ekziston në 35 qytete të botës.
