Qyteti i Prishtinës vazhdon të ketë të bllokuar qarkullimin e autobusëve publikë dhe atyre privatë deri sa të alokohen mjetet në llogaritë e punëtorëve të “Trafikut Urban” dhe operatorëve privatë.
Elmi Gashi nga “Trafiku Urban” tha se sapo të bëhet bartja e parave, punëtorët menjëherë do të rikthehen në punë, duke shtuar se u nevojiten vetëm 30 minuta për t’u përgatitur.
“Protesta vazhdon edhe sot deri në alokimin e mjeteve borxh që detyrohet komuna të lshyjë borxhet ndaj ‘Trafikut Urban’ dhe operatorëve privatë. Vendimi që është marrë ditën e enjte për bartjen e të hyrave vetanake për vitin 2024 në vitin 2025, që arrin vlera 28 milionë, është dërguar nga Komuna te Ministria e Financave. Po presim nga Ministria e Financave që të kthejë këtë vendim me pozitivitet për ne… shpresojmë që sot ose nesër mos po reflektojnë. Në momentin që alokohen paratë, ne dalim në punë; gjysmë ore na duhet kohë për t’u kthyer në normalitet”, tha Gashi.
Edhe kryetari i Shoqatës së Transportit Privat, Izet Smajli, shprehu keqardhjen ndaj qytetarëve dhe theksoi se kompanitë private nuk kanë marrë rroga për gjashtë muaj.
“Ne si kompani private për gjashtë muaj nuk kemi marrë rroga. Për muajin shtator janë paguar, por pesë muajt e tjerë jo. Komuna na ka pasë borxh 2 milionë e 700 mijë euro; pasi ka paguar muajin shtator, tash borxhi është 2 milion. 1 milion e 50 mijë janë paga, dhe 1 milion e 350 mijë euro janë borxh ndaj pikave ku furnizohemi me naftë. Problemi është se nuk mund të fillojmë punën pa u alokuar mjetet. Së pari duhet të paguhen pagat dhe të kryhen obligimet ndaj furnizuesve, pasi nuk japin më naftë pa u paguar. Në atë ditë që i qesin paratë, do të jemi të kënaqur dhe do të fillojmë punën. Ju lus Qeverinë që sa më shpejt t’i qesin dhe të fillojë transporti”, tha Smajli.
