Në Ditën Ndërkombëtare të Zjarrfikësve, Drejtoria për Siguri dhe Emergjenca në Prishtinë ka shprehur mirënjohje për punën dhe përkushtimin e zjarrfikësve të kryeqytetit.
Përmes një njoftimi, është bërë e ditur se gjatë vitit 2025, zjarrfikësit e Prishtinës kanë realizuar gjithsej 3020 intervenime, duke qenë në shërbim të qytetarëve.
Sipas kësaj drejtorie, ndërhyrjet kanë përfshirë zjarre në banesa dhe biznese, aksidente trafiku, përmbytje si dhe situata të tjera emergjente teknike, ku reagimi i shpejtë ka qenë vendimtar.
Po ashtu, është vënë në pah se zjarrfikësit punojnë në kushte të vështira dhe shpesh të paparashikueshme, duke treguar profesionalizëm, disiplinë dhe përkushtim të lartë, edhe përballë rrezikut personal.
