Kryeqyteti i Kosovës është renditur si qyteti i 22-të, me ajrin më të ndotur në botë.
Kjo llogaritje është sipas “IQAir”, ku Prishtina në vendin e 22-të, nivelin e ndotjes e ka regjistruar me indeks 136.
Përmirësimi i ajrit, vlerësohet se nuk mund të ndodhë pa veprime konkrete nga ana e institucioneve ndaj faktorëve kryesor ndotës.
“Institucionet tona deri të arrijnë në nivelin që cilindo ndotës, qoftë termoelektranën, qoftë komunikacionin të vendosin kriteret mbi ndotjen, nuk do të ketë përmirësim. Do të thotë, derisa qeveria dhe institucionet e kufizojnë KEK-un për lirimin e emituesve brenda standardeve, do të vazhdon kjo gjendje. Por edhe veturat të cilat nuk i përmbushin kriteret për më dalë në komunikacion”, ka thënë Sami Makolli ambientalist.
Bazuar në këto nivele të ndotjes, Instituti Kombëtar i Shëndetësisë Publike ka rekomanduar disa masa specifike.
“Urgjentisht të hiqen nga përdorimi veturat e vjetra dhe veturat pa katalizator. Inspektoratet e mjedisit të bëjnë kontrollin rigoroz të kualitetit të karburanteve dhe konsumimit të lëndëve të ngurta djegëse që përdoren për ngrohje nga qytetarët. Ndalimi i importit të veturave të vjetra më shumë se 15 vjet nga vendet e BE-së”, thuhet nga Instituti Kombëtar i Shëndetit Publik.
Kur nivelet e ndotjes janë të larta, për popullatën janë dhënë disa rekomandime.
Sa i përket nivelit të ndotjes, para Prishtinës, janë disa qytete të Kinës e Pakistanit, derisa listën e kryeson qyteti i Sarajevës.
