Tri komuna – Prishtina, Juniku dhe Mamusha – mbeten jashtë publikimit të rezultateve finale për shkak të ankesave ende në shqyrtim.
Kështu ka bërë të ditur kryetari i KQZ-së, Kreshnik Radoniqi, gjatë mbledhjes së sotme të institucionit.
“Nga komunikimi me Panelin Zgjedhor për Ankesa dhe Parashtresa (PZAP), kemi konfirmim se për shumicën e komunave nuk ka më ankesa aktive. Përjashtim bëjnë vetëm Prishtina, Juniku dhe Mamusha, ku disa procedura janë ende në trajtim”, tha Radoniqi.
Ai sqaroi se rezultatet për këto tri komuna do të publikohen vetëm pasi të përfundojnë të gjitha fazat e shqyrtimit të ankesave, përfshirë edhe mundësinë e dërgimit të tyre në Gjykatën Supreme.
“KQZ-ja do të shpallë rezultatet përfundimtare për 35 komunat e tjera, ndërsa për Prishtinën, Junikun dhe Mamushën procesi do të përfundojë pas vendimeve përfundimtare të institucioneve kompetente”, shtoi ai.
