Prishtina është fituese e Kupës së Kosovës. Prishtina të hënën mposhti Gjilanin në finalen e zhvilluarë në stadiumin “Fadil Vokrri” në kryeqytet me rezultat 2:0.
Ekipi i Prishtinës fitoi me dy golat që u shënuan në pjesën e dytë të ndeshjes. Mesfushori Genc Hamiti, zhbllokoi rezultatin në minutën e 68-të të ndeshjes. Hamiti shënoi me një gjuajtje të fortë volej, pasi mori top në zonë nga Mërgim Pefqeli.
Ndërkaq, Pefqeli për rezultatin 2:0 shënoi nga një top i kthyer dhe prej rreth 25 metra mposhti portierin Enea Koliqi për rezultatin 2:0, në minutën e 76-të.
Ndërsa në minutën e 88′ Zeka ngushtoi epërsinë me kokë, pas një asistimi nga Yll Hoxha. Megjithatë goli është anuluar nga gjyqtari Kastrati, pasi mori konfirmimin nga dhoma e VAR-it.
Për Prishtinën kjo është Kupa e shtatë e fituar që nga paslufta, kurse Gjilani ka vetëm një Kupë të fituar në vitin 2000. Gjithashtu, Kupa që Prishtina fitoi është e para në drejtimin e Debatik Currit si trajner.
Prishtina tani do ta shikojë mundësinë të kaloi në Evropë, vetëm në rast se CAS i jep përgjigje pozitive për licencim, ndryshe ekipi i katërt që kalon në Evropë do të jetë Dukagjini.
