Sigal Prishtina ka shënuar fitore në udhëtim ndaj Prizreni 16 me rezultat 99:102 (33:28, 25:30, 24:16, 17:28), në xhiron e 28-të apo të fundit për garat e rregullta në elitën e basketbollit.
Këto dy skuadra do të përballen edhe në çerekfinale të “Play-off”-it, ndërsa në garat e rregullta kishin nga 15 fitore e 13 humbje. Në “Play-off” prizrenasit janë vendas.
Vendasit e nisën ndeshjen më mirë, ku në çerekun e parë kishin epërsi deri në dhjetë pikë, 29:19, ndërsa këtë pjesë e fituan me shifrat 33:28.
Periudha e dytë u karakterizua si shumë e barabartë, dhe gjatë gjithë kësaj pjese, herë njëra skuadër kalonte në epërsi, e herë tjetra, duke e bërë sfidën shumë interesante dhe skuadrat shkuan në pushim me rezultat 58:58.
Pesë minutat e periodës së tretë ishin të barabartë, por më pas prizrenasit kishin epërsi konstante, ku rezultati në semafor pas 30 minutash ishte 82:74.
Por, në dhjetë minutat e fundit prishtinasit shkrinë epërsinë dhe e kthyen atë në favor të tyre, ku epërsinë më të lartë e kishin 14 pikë, 84:98, dhe përkundër që vendasit u rikthyen, nuk arritën rikthimin dhe Prishtina triumfoi 99:102.
Te Prizreni 16 u dalluan Robert McCoy me 30 pikë e dhjetë kërcime dhe Arti Hajdari me 28 pikë, kurse te Sigal Prishtina u dalluan Jetmir Zeqiri me 27 pikë e 14 kërcime, Devin Thomas me 19 pikë e nëntë kërcime dhe Jan Palokaj me 21 pikë.
