Sigal Prishtina ka vazhduar me formën e mirë në Superligën e Kosovës këtë vit, pasi ka regjistruar fitoren e gjashtë rresht.
Të dielën në Prizren, saktësisht palestrën “Sezai Surroi”, Prishtina e mposhti liderin Bashkimin me rezultatin 77:71, në ndeshjen që i takoi xhiros së 20-të.
Prishtina edhe një herë shfaqi një ndeshje të mirë, sidomos në çerekun e dytë për ta bërë diferencën në pikë.
Këtë dhjetëminutësh, Prishtina e fitoi 29:13 për të arritur pastaj deri në fund të takimit ta mbajë epërsinë e pikëve edhe pse Bashkimi nuk dorëzohej dhe kishte përkrahjen e tifozëve.
Josh Nzeakor me 16 pikë e 3 kërcime ishte më i dalluari te Prishtina kurse te Bashkimi me lojë të mirë u veçua Wendell Green me 17 pikë, 4 kërcime e 6 asistime.
Prishtina tani ka tubuar 32 pikë, dy më pak se Bashkimi.
