Klubi i futbollit Prishtina është dënuar nga Komisioni Disiplinor i Federatës së Futbollit të Kosovës pas incidenteve të ndodhura në ndeshjen kampionale kundër Dritës.
Sipas raportit të delegatit të ndeshjes dhe pamjeve televizive, pas përfundimit të takimit tifozët vendas “Plisat” kanë kaluar rrethojat e stadiumit dhe kanë hyrë në fushën e lojës, duke u vërsulur në drejtim të tifozëve mysafirë që ishin të vendosur në tribunën veriore, me tendencë për përleshje mes dy grupeve të tifozëve.
Ndërhyrja e Policisë së Kosovës ka bërë që situata të vihet nën kontroll dhe të evitohet një incident më i madh.
Për shkak të lëshimeve në organizimin e ndeshjes, bazuar në raportin zyrtar dhe në nenin 18 paragrafi 1 si dhe nenin 36 paragrafi 1 pika A të Rregullores Disiplinore, FC Prishtina është dënuar me zhvillimin e dy ndeshjeve kampionale si vendas pa praninë e shikuesve.
Përveç kësaj mase, klubi kryeqytetas është ndëshkuar edhe financiarisht. Duke u bazuar në nenin 6 paragrafi 1 pika C si dhe nenin 18 paragrafi 2 pika B dhe C të Rregullores Disiplinore, Prishtina është dënuar me gjobë prej 2000 eurosh.
Sipas vendimit, klubi ka afat prej 15 ditësh për ta kryer pagesën e gjobës, nga momenti kur vendimi të bëhet i plotfuqishëm.
