Nga anulimi i mbledhjes së dy qeverive që pritej të mbahej në Gjakovë në mes Kosovës dhe Shqipërisë, raportet e kryeministrave të të dyja shteteve kanë ndryshuar.
Nga kjo periudhë, Albin Kurti dhe Edi Rama po komunikojnë me njëri tjetrin vetëm përmes deklarimeve publike.
Madje, ata as nuk u takuan gjatë se enjtes kur kryeministri shqiptar Rama qëndroi në Prishtinë.
E kjo ftohje mes dy liderëve, po shihet si prishje e raporteve në mes dy shteteve shqiptare.
Njohësi i çështjeve politike, Dritëro Arifi thotë se me këtë komunikim shihet se nuk ka mirëkuptim në mes tyre.
Nga ana tjetër, sipas anëtarit të kryesisë së Partisë Demokratike të Kosovës, Adri Nurellari kjo situatë është shqetësuese.
Ai thotë se Kurti ka dërguar marrëdhënien ndërshtetërore në pikën më të ulët.
Mbledhja e përbashkët e dy qeverive shqiptare e paraparë të mbahej me 14 qershor ishte anuluar nga kryeministri i Shqipërisë Edi Rama.
Kjo me arsyen se nuk mund të mbahej ai takim në kushtet e përkeqësimit të marrëdhënieve të Kosovës me bashkësinë ndërkombëtare, për shkak të situatës në komunat e veriut të Kosovës.
