Tekniku nga Italia, Rolando Maran është selektori i ri i Kombëtares së Shqipërisë, duke e zëvendësuar në këtë post brazilianin Sylvinho.
Federata Shqiptare e Futbollit, të martën ka prezantuar italianin Maran në konferencën për shtyp, në të cilën ishte i pranishëm edhe Sylvinho, si dhe presidenti i FSHF-së, Armand Duka.
Duka ka thënë se së bashku me Sylvinhon janë dakorduar që t’I japin fund aventurës për të nisur një cikël të ri me selektorin Maran.
Duka ka falënderuar për gjithçka Sylvinhon, i cili ka pasur rastin të përshëndetet më të gjithë, duke shprehur mirënjohjen për vitet e kaluara te Shqipëria.
Sylvinho ishte në krye të Shqipërisë për tre vjet e gjysmë, duke arritur ta kualifikojë në “Euro 2024” kurse për Botërorin 2026, arriti deri në gjysmëfinale të “play-offit”.
Në anën tjetër, italiani Maran është i gatshëm për të nisur punën e tij te Shqipëria, ky synimi primar do të jetë vendi i parë në Ligën e Kombeve.
Maran 62-vjeçar, si trajner ka punuar vetëm në Itali duke drejtuar skuadra nga Serie A dhe Serie B, të fundit Brescian në sezonin 2023/24.
Karrierën si trajner, Maran e ka nisur në vitin 2002 te Cittadella, ndërsa ka udhëhequr edhe ekipet si Bari, Triestina, Vicenza, Varese, Catania, Chievo, Cagliari, Genoa e Pisa.
Maran në krye të Shqipërisë do të debutojë muajin tjetër, ndërsa ka falënderuar Sylvinhon për punën e bërë gjatë kësaj kohe si selektor i Shqipërisë.
Ai ka thënë se ndihet i nderuar që do të jetë në krye të Shqipërisë, ndërsa ka falënderuar Dukën për besimin që ka treguar ndaj tij.
Për italianin Maran, Shqipëria është kombëtarja e parë që e drejton në karrierën e tij si trajner.
