Zëvendëskryeministri dhe ministri i Punëve të Jashtme i Belgjikës, Maxime Prevot, pas takimit me homologun kosovar Glauk Konjufca, ka deklaruar se Belgjika do të angazhohet aktivisht për anëtarësimin e Kosovës në Këshillin e Evropës.
Ai, në konferencën e përbashkët për media ka theksuar se tani është koha për avancim në këtë proces.
“Duke folur për Këshillin e Evropës, në mënyrë aktive do të avokojë për anëtarësimin tuaj, jo në të ardhmen, por tani është koha. Belgjika mbetet e përkushtuar që të fuqizojë dialogun bilateral dhe të thellojë bashkëpunimin, veçanërisht duke pasur parasysh rëndësinë e diasporës kosovare në Belgjikë”, ka thënë Prévot në konferencën për media.
Ai ka shtuar se vizita e tij në Kosovë tregon angazhimin konkret të Belgjikës dhe mbështetjen për perspektivën evropiane të vendit.
“Të nderuar koleg, llogarisni në mua si mbështetës të fuqishëm tuajin dhe mesazhi im është i qartë: anëtarësimi në familjen evropiane mbetet një perspektivë e besueshme dhe Belgjika është e gatshme të mbështesë më tej aplikimin tuaj”, është shprehur ai.
Prévot ka theksuar gjithashtu se do të vazhdojë të ngrejë në diskutime nevojën për mbështetjen e Kosovës drejt familjes euroatlantike, duke nënvizuar rëndësinë e përafrimit me politikën e jashtme dhe të sigurisë së BE-së.
Ai ka shtuar se integrimi evropian është i lidhur ngushtë me stabilitetin rajonal dhe normalizimin e marrëdhënieve ndërmjet Kosovës dhe Serbisë.
“Belgjika mbështet plotësisht dialogun e ndërmjetësuar nga BE. Angazhimi i vazhdueshëm dhe progresi i prekshëm i marrëveshjeve janë të domosdoshme për stabilitetin rajonal dhe të ardhmen evropiane të Kosovës”, ka thënë ai.
Prévot është shprehur se stabiliteti politik është çelësi për progresin e vendit dhe ka ripohuar mbështetjen e fuqishme të Belgjikës për Kosovën në rrugën e saj evropiane.
