Presidentja e Republikës së Kosovës, Justina Shiroka-Pula, ka uruar Shaip Kamberin dhe Visar Memetin për fitimin e dy mandateve në Kuvendin e Serbisë, duke vlerësuar bashkimin politik të shqiptarëve të Luginës së Preshevës.
Përmes një njoftimi, Shiroka-Pula ka theksuar se rezultati zgjedhor i shqiptarëve të Preshevës, Bujanocit dhe Medvegjës dëshmon rëndësinë e unitetit politik, besimit të qytetarëve dhe përkushtimit të përbashkët.
“Shqiptarët e Preshevës, Bujanocit e Medvegjës me dy mandate të fituara në Kuvendin e Serbisë, dëshmuan se bashkimi politik, besimi i qytetarëve dhe përkushtimi i përbashkët sjellin rezultat”, thuhet në njoftimin e Presidencës.
Ajo u ka shprehur urimet e saj dy deputetëve shqiptarë, duke e cilësuar këtë rezultat si një fitore të përbashkët.
“Urime të sinqerta deputetëve: Shaip Kamberi dhe Visar Mehmeti. Kjo fitore është e juaja dhe e gjithë shqiptarëve”, thuhet më tej në njoftim.
Shiroka-Pula ka shprehur gjithashtu pritshmërinë që ky rezultat të shërbejë si pikënisje për një përfaqësim më të fuqishëm politik të shqiptarëve, mbrojtje më efektive të të drejtave të tyre dhe zhvillim ekonomik.
“Qoftë ky rezultat fillimi i një përfaqësimi më të fuqishëm, i mbrojtjes më efektive të të drejtave, i zhvillimit ekonomik dhe i respektimit të plotë të dinjitetit kombëtar”, thuhet në njoftimin e Presidencës.
Në fund, ajo u ka bërë thirrje deputetëve që ta ruajnë unitetin edhe gjatë mandatit të ri, duke theksuar rëndësinë e bashkimit për përfaqësimin e interesave të shqiptarëve.
“Vazhdoni me të njëjtin unitet edhe në mandatin që keni fituar, sepse forca e vërtetë qëndron te bashkimi”, përfundon njoftimi i Presidencës së Republikës së Kosovës.
