Presidentja e Republikës së Kosovës, Vjosa Osmani, ka zhvilluar një takim të rëndësishëm diplomatik në Washington D.C. me Zëvendës Sekretarin e Shtetit të SHBA-së, Christopher Landau.
Përmes një postimi në rrjetet sociale, Presidentja Osmani ka falënderuar për mikpritjen e ngrohtë dhe diskutimin e hapur, duke theksuar se Kosova mbetet e përkushtuar për të ndërtuar kapituj të rinj të bashkëpunimit strategjik me Shtetet e Bashkuara të Amerikës.
“Faleminderit për mikpritjen e ngrohtë dhe diskutimin e hapur në Washington D.C., Zv. Sekretar i Shtetit, Christopher Landau! Kosova qëndron krah për krah me Shtetet e Bashkuara për të ndërtuar kapituj të rinj të bashkëpunimit strategjik, në përputhje me vizionin e fortë të Presidentit Trump,” – ka shkruar Osmani.
Ajo shtoi se ky partneritet synon të sjellë më shumë siguri, më shumë zhvillim dhe më shumë mundësi për qytetarët dhe bizneset e Kosovës.
Takimi vjen në vazhdën e përpjekjeve të Kosovës për forcimin e marrëdhënieve me aleatin e saj kryesor, Shtetet e Bashkuara të Amerikës, në fusha të ndryshme si siguria, zhvillimi ekonomik dhe diplomacia ndërkombëtare.
