Presidentja e Republikës së Kosovës, Vjosa Osmani, ka vazhduar sot takimet me kryetarët e partive më të vogla parlamentare, në përpjekje për të gjetur zgjidhje lidhur me konstituimin e legjislaturës së re të Kuvendit.
Në kuadër të këtyre konsultimeve, Presidentja Osmani ka pritur në Presidencë deputetin goran dhe kryetarin e partisë Jedinstvena Goranska Partija, Adem Hoxha, me të cilin ka diskutuar për situatën aktuale dhe rrugën përpara në përputhje me rendin kushtetues.
Takimet e sotme vijnë pas rundit të parë të konsultimeve, të mbajtur të mërkurën, kur presidentja ka zhvilluar bisedime me krerët e partive më të mëdha politike në vend, duke kërkuar kontribut të përbashkët për kapërcimin e bllokadës parlamentare.
Sipas një komunikate nga Presidenca, Presidentja Osmani ka theksuar se:
“Në frymën e bashkëpunimit dhe mirëbesimit, si dhe në dobi të interesit qytetar dhe shtetëror, sa më shpejt, por gjithsesi brenda afatit 30-ditor të përcaktuar nga Gjykata Kushtetuese, të arrihet një pajtim rreth rrugës përpara për konstituimin e Kuvendit.”
Këto takime janë pjesë e përpjekjeve institucionale për të tejkaluar ngërçin aktual politik dhe për të siguruar funksionalitetin e plotë të Kuvendit të Kosovës.
