Presidentja e Kosovës, Vjosa Osmani, ka reaguar pas përhapjes së vatrave të shumta të zjarrit në disa komuna të vendit, duke e cilësuar situatën si alarmante dhe kërkuar reagim të menjëhershëm nga të gjitha nivelet institucionale.
Në një postim në Facebook, Osmani ka shprehur solidaritet me qytetarët e prekur dhe mirënjohje për zjarrfikësit, ekipet e emergjencës dhe vullnetarët që po përballen me flakët në kushte të vështira.
“Komuna të shumta të vendit tonë po përballen me vatra të shumta zjarri që po shkaktojnë dëme të konsiderueshme materiale dhe mjedisore. Situata është sfiduese dhe kërkon reagim të koordinuar dhe të menjëhershëm nga të gjitha nivelet,” ka shkruar Osmani.
Ajo ka theksuar se institucionet janë të mobilizuara dhe se Forca e Sigurisë së Kosovës është në gatishmëri për të ndihmuar nëse kërkohet ndërhyrje shtesë.
Presidentja i ka bërë thirrje qytetarëve për kujdes të shtuar dhe raportim të menjëhershëm të çdo vatre të dyshimtë:
“Vetëm me përgjegjësi kolektive mund ta parandalojmë përhapjen e mëtejshme të zjarreve. Mbështetja dhe bashkëpunimi i secilit prej nesh është thelbësor për ta përballuar këtë situatë,” ka përfunduar ajo.
Zjarret, që kanë përfshirë zona të ndryshme në vend, po paraqesin një sfidë serioze për autoritetet dhe kërkojnë veprime të koordinuara për të parandaluar përhapjen e mëtejshme.
