Presidentja e Kosovës, Vjosa Osmani, ka pritur në takim komandantin e ri të KFOR-it, gjeneralmajor Ozkan Ulutash, pas marrjes së detyrës së tij në krye të misionit paqeruajtës në Kosovë.
Në njoftim të Presidencës është bërë e ditur se gjatë takimit, presidentja Osmani e uroi gjeneralmajorin Ulutaş për detyrën e re dhe për rikthimin e tij në Kosovë, duke shprehur besimin për vazhdimin e bashkëpunimit të ngushtë ndërmjet institucioneve të Kosovës dhe KFOR-it në funksion të paqes dhe sigurisë në vend dhe rajon.
Në këtë kuadër, Osmani shprehu mirënjohje për angazhimin dhe përkushtimin e të gjithë pjesëtarëve të KFOR-it që shërbejnë në Kosovë.
Duke diskutuar për zhvillimet në fushën e sigurisë dhe kërcënimet që vijnë nga Serbia, përfshirë edhe përdorimin e dronëve, Presidentja theksoi rëndësinë e koordinimit të ngushtë mes KFOR-it dhe institucioneve të sigurisë së Kosovës për të parandaluar taktikat destabilizuese. /teve1.info/
