Në Uashington presidenti amerikan Donald Trump u nderua me çmimin për “Paqe” nga FIFA, gjatë tërheqjes së shortit për Kampionatin Botëror “FIFA World Cup 2026”, short i cili po transmetohet drejtpërdrejt në Radiotelevizionin e Kosovës (RTK).
Në një prezantim për dhënien e çmimit, është përmendur se Trumpi ndaloi tetë luftëra, përfshirë atë mes Kosovës dhe Serbisë.
Presidenti i FIFA-s, Gianni Infantino, i cili ka ndërtuar një marrëdhënie të fortë me presidentin amerikan, e ka mbështetur Trumpin për Çmimin Nobel më herët këtë vit.
Kurse presidenti amerikan tha se ndjehet i nderuar me këtë çmim.
Trump: Ne i përfunduam luftërat edhe para se të fillonin
Donald Trump foli pas nderimit me Çmimin e Paqes nga FIFA. “Kjo është vërtet një nga nderimet më të mëdha të jetës sime. Kaq shumë luftëra të ndryshme që ne arritëm t’i ndalonim, në disa raste pak para se të fillonin, pikërisht para se të fillonin,” tha Trump.
Duke folur për Kupën e Botës që do të zhvillohet verën e ardhshme, presidenti amerikan shtoi: “Do të keni një ngjarje të tillë që ndoshta bota nuk e ka parë kurrë më parë.”
Gjatë ceremonisë së dhënies së Çmimit të Paqes nga FIFA, u vlerësua roli i Donald Trump pë ndalimin e disa konflikteve ndërkombëtare dhe përpjekjet e tij për paqe.
Infantino theksoi se Trump kishte ndërmarrë veprime të jashtëzakonshme për paqen, të cilat ishin shembull për bashkëpunimin ndërkombëtar dhe për përdorimin e futbollit si mjet për promovimin e paqes.
“Ne duam të jetojmë në një botë dhe mjedis të sigurt, duam të bashkohemi dhe kjo është ajo që do të bëjmë në Kupën e Botës, prandaj i dhamë këtë çmim. Ka mbështetjen time dhe të të gjithë komunitetit të futbollit për të ndihmuar në lulëzimin e paqes në të gjithë botën”. Këto ishin fjalët e Presidentit të FIFA-s, Gianni Infantino, duke ia dorëzuar çmimin Trump.
