Presidenti i Këshillit Evropian, Antonio Costa, dhe Presidentja e Komisionit Evropian, Ursula von der Leyen, u takuan të martën me presidentin sirian, Ahmed al-Sharaa, në kuadër të Asamblesë së Përgjithshme të OKB-së në Nju Jork.
Në një deklaratë të përbashkët në platformën e kompanisë amerikane të mediave sociale X, udhëheqësit e BE-së thanë se patën një “shkëmbim të mirë” me al-Sharaa-n mbi sfidat me të cilat përballet Siria gjatë tranzicionit të saj.
Ata përsëritën mbështetjen e bllokut për “një tranzicion të vërtetë, gjithëpërfshirës, paqësor dhe të udhëhequr nga Siria, të lirë nga ndërhyrjet e dëmshme të huaja”.
“Ne jemi të përkushtuar për të rritur dialogun tonë politik, për të përmbushur nevojat e menjëhershme humanitare dhe për të mbështetur rimëkëmbjen socio-ekonomike dhe rindërtimin e Sirisë”, thanë ata, citon Anadolu.
Bashar al-Assad, udhëheqësi i Sirisë për gati 25 vjet, iku në Rusi dhjetorin e kaluar, duke i dhënë fund regjimit të Partisë Ba’ath, e cila kishte qenë në pushtet që nga viti 1963. Një administratë e re kalimtare e udhëhequr nga al-Sharaa u formua në janar.
Që nga rrëzimi i Assadit, administrata e re e Sirisë ka ndjekur reforma politike dhe ekonomike, duke promovuar kohezionin social dhe duke punuar për të zgjeruar bashkëpunimin me partnerët rajonalë dhe ndërkombëtarë.
