Presidenti palestinez, Mahmoud Abbas, duke folur nëpërmjet një lidhjeje video, tha se Hamasi nuk duhet të ketë “asnjë rol” në qeverisjen e Gazës në të ardhmen dhe i bëri thirrje grupit të dorëzojë armët e tij.
“Hamasi dhe fraksionet e tjera duhet t’ia dorëzojnë armët e tyre Autoritetit Palestinez,” deklaroi ai. “Ajo që duam është një shtet i bashkuar pa armë, një shtet me një ligj dhe një forcë legjitime sigurie.”
Abbas bëri thirrje gjithashtu për një armëpushim të përhershëm dhe për sigurimin e aksesit në ndihmë humanitare përmes OKB-së dhe UNRWA-s.
Ai theksoi se rindërtimi i Gazës dhe Bregut Perëndimor të pushtuar duhet të fillojë “pa vonesë”, citon The Guardian.
Sipas tij, brenda tre muajve nga përfundimi i luftës do të hartohet një kushtetutë e përkohshme për të siguruar transferimin e saktë të pushtetit nga autoriteti te shteti.
“Zgjedhjet do të mbahen më pas nën vëzhgim ndërkombëtar,” shtoi ai, duke përshkruar aspiratat për një shtet të qeverisur nga sundimi i ligjit.
Abbas përgëzoi 149 shtetet që e kanë njohur tashmë shtetin palestinez dhe u bëri thirrje të tjerëve të ndjekin shembullin e tyre.
Ai gjithashtu shprehu gatishmërinë për të punuar me presidentin e SHBA-së, Donald Trump, Arabinë Saudite dhe partnerë të tjerë për të zbatuar çdo plan paqeje të miratuar gjatë konferencës së OKB-së.
