Presidenti iranian Masoud Pezeshkian, gjatë fjalimit të tij në Asamblenë e Përgjithshme të OKB-së, u rikthye te sulmet izraelite ndaj Iranit në muajin qershor, të cilat çuan në një konflikt 12-ditor mes dy vendeve.
“Vendi im iu nënshtrua një agresioni të egër,” deklaroi ai, duke shtuar se veprimet e Izraelit “përbënin një tradhti të rëndë të diplomacisë.”
Sipas Pezeshkian, ky “akt i paturpshëm agresioni” ishte përgjegjës për “martirizimin” e fëmijëve dhe shkencëtarëve iranianë.
Në vijim të fjalimit, presidenti iranian foli për “gjendjen e botës sonë” gjatë dy viteve të fundit, duke u ndalur te veprimet e Izraelit në rajon.
Ai përmendi “gjenocidin në Gaza”, “shkatërrimin e infrastrukturës në Siri” dhe “sulmet në Jemen”, të gjitha këto, sipas tij, të kryera “me mbështetjen e plotë të regjimit më të armatosur në botë dhe nën pretekstin e vetëmbrojtjes.”
“Kush është në të vërtetë shqetësuesi i njerëzve në botë?”, pyeti Pezeshkian para Asamblesë.
Ai e përshkroi veprimin izraelit si “agresion i rrënjosur në shtrëngim dhe ngacmim”, ndërsa përvijoi vizionin e tij për të ardhmen: një “të ardhme të shkëlqyer”, ku Irani qëndron i fuqishëm përkrah fqinjëve të tij, përballë “një projekti të madh që imponon gjenocid” në rajon.
Duke iu referuar programit bërthamor të Iranit, Pezeshkian theksoi se vendi i tij “nuk ka kërkuar dhe nuk do të kërkojë kurrë” ndërtimin e një bombe bërthamore.
“Ne nuk kërkojmë armë bërthamore,” u shpreh ai, duke iu referuar një dekreti të udhëheqësit suprem, Ajatollah Khamenei.
