“Po e dërgojmë luftën në territorin e agresorit”.
Kështu tha presidenti ukrainas Volodymyr Zelenskyy me anë të një video lidhjeje, një deklaratë e cila po konsiderohet si pranim nga ana e tij se ushtria ukrainase është duke kryer një ofensivë brenda rajonin perëndimor rus, Kursk.
Zelenskyy përgëzoi brigadat luftarake ukrainase në të gjithë vijën e frontit, duke përfshirë rajonin Sumy, i cili ndodhet ngjitur me Kursk.
Ai tha gjithashtu se gjenerali Oleksandr Syrskyi, komandanti i forcave të armatosura të Ukrainës, i kishte dërguar atij raporte të shumta në lidhje me situatën e vijës së parë.
“Sot, Komandanti i Përgjithshëm Syrskyi ka raportuar tashmë disa herë për situatën e vijës së frontit dhe për veprimet tona për të shtyrë luftën në territorin e agresorit. Falënderoj çdo njësi të Forcave tona të Mbrojtjes që e mundësuan një gjë të tillë. Ukraina po dëshmon se me të vërtetë di të rivendosë drejtësinë”, tha Zelenskyy.
Kievi e ka nisur një sulm të papritur të martën dhe avancuar shpejt, më shumë se 10 kilometra brenda Rusisë ,duke shënuar ndërhyrjen më të thellë prej kur Moska e ka nisur luftën në Ukrainë, në shkurt të vitit 2022.
Në Ukrainë, Kievi dhe disa rajone tjera janë përballur me sulme raketore ruse, si dhe me sulme me dronë, në orët e para të së dielës, kanë thënë zyrtarët lokalë.
Deri më tani Rusia nuk ka arritur të pengojë avancimin ukrainas.
Më shumë se 76.000 njerëz janë evakuuar nga rajoni Kursk dhe autoritetet kanë nisur të zbatojnë masa kundër terrorizmit në atë zonë, dhe rajone tjera kufitare.
Inkursioni ukrainas në Rusi, i nisur në martën, është kryer me gati 1.000 ushtarë, tanke dhe pajisje të armatosura, ka thënë Rusia.
Prej atëherë, ukrainasit është raportuar të ketë fituar kontrollin e disa fshatrave, dhe janë duke kërcënuar për të fituar edhe qytezën rajonale ruse, Sudzha.
Inkursioni atje këtë javë nga forcat ukrainase i kapi trupat ruse në befasi dhe ekspozoi dobësitë e saj ushtarake në luftën gati dy vjet e gjysmë.
Bastisja që filloi të martën është sulmi më i madh ndërkufitar i luftës dhe ngre shqetësime për përhapjen e luftimeve përtej Ukrainës.
Qëllimet strategjike të operacionit të guximshëm ukrainas janë të paqarta dhe ka pak informacion të besueshëm.
