Presidenti i Kroacisë, Zoran Milanoviç, tha se urdhëroi pezullimin e të gjithë bashkëpunimit midis Forcave të Armatosura Kroate (OSRH) dhe ushtrisë izraelite për shkak të asaj që ai e përshkroi si shkelje të ligjit ndërkombëtar humanitar nga Izraeli.
Në një deklaratë të lëshuar në mediat sociale të hënën, Milanoviç tha se “për shkak të sjelljes së papranueshme të ushtrisë izraelite dhe shkeljes së paprecedentë të të gjitha normave të së drejtës ndërkombëtare humanitare”, ai që në maj të vitit të kaluar “urdhëroi ndërprerjen e çdo bashkëpunimi midis OSRH-së dhe ushtrisë izraelite”, duke përfshirë të gjithë anëtarët e ushtrisë kroate.
Ai shtoi se në të njëjtën kohë, i kishte bërë thirrje qeverisë kroate “të ndalojë çdo formë të tregtisë së armëve dhe pajisjeve ushtarake me Izraelin”.
Milanoviç tha se në një telefonatë të kohëve të fundit, ai e paralajmëroi drejtpërdrejt kryeministrin Andrej Plenkoviç se “çdo formë bashkëpunimi ushtarak me Izraelin do të ishte e papranueshme”, ka cituar TRT World.
Duke iu referuar një vizite zyrtare të Ministrit të Mbrojtjes Ivan Anusic në Izrael të hënën, ku ai u takua me përfaqësues të kompanive izraelite të industrisë së mbrojtjes dhe zyrtarë nga Drejtoria për Bashkëpunim Ndërkombëtar të Mbrojtjes në Ministrinë e Mbrojtjes së Izraelit, Milanoviç theksoi se si komandant i përgjithshëm i OSRH-së, ai përsërit se “OSRH nuk do të bashkëpunojë me ushtrinë izraelite në asnjë mënyrë, as tani dhe as në të ardhmen”.
