Gjatë fjalimit të tij në mbledhjen e Asamblesë së Përgjithshme të Kombeve të Bashkuara, presidenti i Kolumbisë, Gustavo Petro, mbajti një deklaratë të fuqishme dhe kritike ndaj rolit të OKB-së dhe komunitetit ndërkombëtar në lidhje me luftën në Gaza.
Presidenti Petro tha se organizata që dikur simbolizonte paqen dhe bashkëpunimin ndërkombëtar është kthyer në një spektatore të heshtur të tragjedisë në Palestinë.
“OKB është bërë pjesëmarrëse në gjenocid. Kjo sallë është dëshmitar i heshtur i një gjenocidi,” deklaroi Petro para delegacioneve ndërkombëtare.
Ai theksoi se ideja e racave superiore apo popujve të “zgjedhur nga Zoti” është e rrezikshme dhe e nxitur nga ekstremizmi i djathtë.
“Nuk ka racë superiore, nuk ka njerëz të zgjedhur të Zotit, nuk janë as Shtetet e Bashkuara as Izraeli. Injorantët e të djathtës ekstreme mendojnë kështu. I gjithë njerëzimi është i zgjedhur prej Zotit.”
Duke kërkuar veprim të menjëhershëm, Petro u shpreh se është momenti që OKB të ndryshojë dhe të ndërmarrë hapa konkretë për të ndalur dhunën në Gaza.
“OKB duhet të ndryshojë tani, dhe para çdo gjëje duhet të ndalë gjenocidin në Gaza. Njerëzimi nuk mund të lejojë as edhe një ditë të vetme të gjenocidit.”
Sipas tij, diplomacia ka dështuar në rastin e Gazës dhe tani kërkohen veprime më të vendosura për të ndalur gjakderdhjen.
“Roli i diplomacisë tashmë është shterrur në rastin e Gazës, nuk mund ta zgjidh atë. Gjenocidi duhet të ndalet nga ajo që vjen pas diplomacisë.”
Petro bëri thirrje për veprim përmes një votimi në Asamblenë e Përgjithshme të OKB-së dhe jo përmes Këshillit të Sigurimit, ku vetoja e disa vendeve anëtare mund të bllokojë vendime të rëndësishme.
“Duhet të jetë përmes një vote në Asamblenë e Përgjithshme të OKB-së, jo përmes votës së Këshillit të Sigurimit që mund t’i vendoset veto. Duhet përmes një Unioni për Paqe për Palestinën të formohet një forcë e armatosur për të mbrojtur jetën e palestinezëve.”
Në fund, presidenti kolumbian bëri një thirrje të hapur drejtuar gjithë botës për solidaritet dhe ndërhyrje aktive.
“Për këtë arsye i ftoj njerëzit e gjithë botës të bashkojnë ushtritë dhe armët. Palestina duhet të lirohet, për shkak se nuk do të bombardohet vetëm Gaza, jo vetëm Karaibet siç është duke u bërë, por vet njerëzimi që po kërkon liri.”
Fjalimi i Petro-s është një ndër deklaratat më të forta të dhëna nga një lider botëror në mbështetje të Palestinës në forumet ndërkombëtare gjatë vitit 2025.
