Presidenti i Finlandës, Alexander Stubb tha se mendon që qeveritë evropiane duhet të nisin kontakte të drejtpërdrejta me Moskën, duke theksuar se një marrëveshje paqeje nuk pritet të arrihet të paktën gjatë këtij viti.
“Është koha për të filluar të flasim me Rusinë. Kur do të ndodhë kjo, nuk e di”, deklaroi Stubb në një intervistë për të përditshmen italiane Corriere della Sera, e publikuar të hënën.
Ai tha se qasja e Shteteve të Bashkuara ndaj Rusisë dhe Ukrainës nuk përputhet më plotësisht me interesat evropiane, ndaj sipas tij Evropa duhet të marrë iniciativa të drejtpërdrejta në komunikimin me Moskën.
“Unë besoj se paqja nuk është në tryezë, të paktën për këtë vit”, tha ai, duke shtuar se vendet evropiane po diskutojnë se kush duhet të vendosë kontaktin e parë me Rusinë, por nënvizoi: “Nuk e dimë ende”.
“Gjëja më e rëndësishme është që gjithçka duhet të koordinohet midis nesh, veçanërisht midis E5 (Gjermania, Franca, Italia, Mbretëria e Bashkuar dhe Polonia) dhe vendeve nordike dhe baltike, të cilat janë në kufi. Nëse do të jetë një i dërguar special apo një grup udhëheqësish, do ta shohim.”
I pyetur nëse liderët evropianë kishin vepruar drejt duke mos mbështetur Shtetet e Bashkuara në konfliktin e saj me Iran, Stubb tha se reagimi evropian lidhej me faktin që Presidenti amerikan, Donald Trump nuk ishte konsultuar me aleatët evropianë para sulmit.
“Tani shpresojmë që amerikanët dhe iranianët do të gjejnë një zgjidhje, një armëpushim të qëndrueshëm. Ata duken afër. Në atë pikë, çdo iniciativë që mund të rihapë Ngushticën e Hormuzit duhet të përfshijë edhe Evropën”, shtoi ai.
