Presidenti i Shqipërisë, Bajram Begaj të dielën ka qëndruar për vizitë në Kosovë ku ka bërë homazhe në Kompleksin Memorial të Dëshmorëve në Gllogjan. Komuna e Deçanit ka nderuar presidentin Begaj me titullin “Qytetar nderi i Deçanit”.
Presidenti Bajram Begaj vlerëson lartë gjithë sakrificën dhe gjakun e derdhur të dëshmorëve për lirinë në Kosovë. Ai shtoi se liria duhet të mbrohet me çdo kusht.
“Është kënaqësi të jem këtu në Deçan, në këtë vend të shenjt për të vazhduar festimet tona për 25-vjetorin e Çlirimit të Kosovës. Jemi këtu për të vlerësuar gjithë sakrificën, gjithë gjakun e derdhur për të arritur në këtë ditë të lirisë që është e jashtëzakonshme për ne dhe për shqiptarët. Prandaj, duhet ta mbrojmë me çdo kusht”, theksoi ai.
Kryetari i Aleancës për Ardhmërinë e Kosovës (AAK), Ramush Haradinaj, duke iu uruar mirëseardhje presidentit Begaj, ka theksuar se në Kompleksin Memorial të Dëshmorëve në Gllogjan qëndrojnë heronj të zot, të cilat kontribuuan për çlirimin e vendit.
“Në ditët më të bukura tona, presidenti i Shqipërisë me zonjën e parë, Shkëlqesia e tij, gjeneral Bajram Begaj ka vizituar Gllogjanin, Deçanin edhe një herë, pra Kosovën. Jam i nderuar të qëndroj para jush president Begaj në këtë vend këtu ku qëndrojnë e pushojnë luftëtarë të zot, shqiptarë të zot, heronj të mirë. Jam i bindur që ata janë të gëzuar që ne sot jemi bashkë”, u shpreh Haradinaj, shkruan KP.
Pas kësaj vizite, ish-Shefi i Shtabit të Përgjithshëm të Forcave të Armatosura, Bajram Begaj është shpallur “Qytetar Nderi” i Komunës së Deçanit.
