Presidenca e Kosovës ka reaguar ashpër pas qarkullimit në rrjetet sociale të një fotografie të manipuluar, të krijuar përmes inteligjencës artificiale, e cila paraqet në mënyrë të rreme Presidenten Vjosa Osmani dhe kryeparlamentaren serbe Ana Brnabić.
Në reagimin zyrtar theksohet se fotografia është e sajuar me qëllim të qartë për të dëmtuar figurën e Presidentes dhe për të ushqyer narrativat e fabrikuara që i shërbejnë agjendave të huaja.
“Pamja është FAKE, një montazh i krijuar për të shkaktuar konfuzion dhe për ta goditur Presidenten Osmani, e cila çdo ditë, me seriozitet dhe integritet institucional, mbron interesat e Kosovës dhe përfaqëson shtetin me dinjitet në arenën ndërkombëtare,” thuhet në reagim.
Presidenca e ka cilësuar veprimin si të papranueshëm, të rrezikshëm dhe pjesë të një fushate të organizuar dezinformuese që synon të dëmtojë udhëheqjen e vendit dhe të minojë stabilitetin institucional.
Më tej, në njoftim theksohet:
“Presidentja Osmani ka qenë dhe mbetet një zë i fuqishëm i shtetësisë dhe dinjitetit të Kosovës. Asnjë foto e rreme nuk mund ta zbehë këtë.”
Presidenca u ka bërë thirrje Policisë së Kosovës dhe institucioneve të tjera kompetente që të ndërmarrin veprimet e nevojshme ndaj përhapësve të kësaj dezinformate, duke paralajmëruar se praktika të tilla cenojnë sigurinë publike dhe paraqesin rrezik të drejtpërdrejtë për institucionet shtetërore.
