Presidenca e Kosovës ka përmbledhur vizitën e Presidentes Vjosa Osmani në Shtetet e Bashkuara të Amerikës, ku ajo mori pjesë në aktivitetet e Javës së Nivelit të Lartë të Kombeve të Bashkuara (OKB).
Gjatë qëndrimit në SHBA, Osmani zhvilloi takime të rëndësishme me zyrtarë të lartë amerikanë me qëllim thellimin e raporteve dypalëshe mes Kosovës dhe Shteteve të Bashkuara. Në njoftimin zyrtar theksohet se ajo pati “biseda përmbajtësore” me Presidentin Donald Trump, senatorin Marco Rubio, Zëvendëssekretarin e Shtetit Christopher Landau, Sekretarin e Tregtisë Howard Lutnick, si dhe me senatorë dhe kongresistë të tjerë.
Po ashtu, presidentja Osmani zhvilloi takime edhe me Kryediplomaten e Bashkimit Evropian, Kaja Kallas, si dhe me presidentë dhe kryeministra të vendeve të ndryshme pjesëmarrëse në samit.
Gjatë vizitës, Osmani mori pjesë në disa panele dhe takime me komunitetin e mërgatës kosovare në SHBA, si dhe vizitoi Kolegjin e Luftës së Ushtrisë Amerikane, duke forcuar kështu lidhjet institucionale dhe diplomatike ndërmjet Kosovës dhe partnerëve ndërkombëtarë.
