Arsenali dhe Manchester City po shkojnë drejt fazës finale për titullin e kampionit në Premier League të Anglisë.
Të dyja skuadrat lidere të elitës së futbollit anglez, në fundjavë do të luajnë me kundërshtarë të pjesës së poshtme të tabelës.
Arsenali, të dielën nga ora 15:00 luan në udhëtim te West Hami, kurse City të shtunën prej orës 18:30 e pret në shtëpi Leicester Cityn.
Këto ndeshje i takojnë xhiros së 31-të të kampionatit anglez.
Arsenali është lider me 73 pikë, gjashtë më shumë se City i vendit të dytë. City ka një ndeshje më pak të zhvilluar, kurse do të jetë nikoqir i Arsenalit më 26 prill.
West Hami, ndërkohë është në pozitën e 14-të me 30 pikë, kurse Leicester City i parafundit ka 25 pikë.
Nga vendi i 14-të deri në pozitën e 20-të në tabelë, ekipet kanë vetëm shtatë pikë dallim.
City është në kërkim të fitores së 10-të rresht, ndërsa Leicesteri do të mundohet të marrë rezultat pozitiv pasi ka nëntë ndeshje pa fitore. Dean Smith do të debutojë si trajner i ri i Leicesterit.
Nga ana tjetër, City ka shënuar 34 gola në nëntë fitoret e fundit, përfshirë edhe tri të cilat i realizoi në mesjavë ndaj Bayern Munichut.
Erling Haaland ishte një prej realizatorëve kundër bavarezëve, teksa shkoi në kuotën e 45 golave në total këtë sezon, në të gjitha garat.
Atij i duhen vetëm edhe dy gola më shumë për ta barazuar rekordin e sulmuesit Mohamed Salah në Premier League me 32 gola të shënuar, në sezonin me 38 ndeshje.
Arsenali i lejoi Cityt të afrohet pasi në fundjavën e kaluar barazoi në derbin kundër Liverpoolit, 2:2.
Në Ligën e Kampionëve pas 20 vjetësh synon të kthehet skuadra e Newcastlei, që është në seri prej pesë fitoreve.
