E sot, shumë fëmijë vizituan kompleksin memorial “Adem Jashari”. Se si ishte atmosfera në Prekaz, një ditë para festës së 28 nëntorit, ndjekim kronikën në vazhdim.
Në vendin ku ra heroikisht po i këndojnë legjendarit Adem Jashari.
Një ditë para festës së 28 Nëntorit, këta fëmijë të shkollës fillore “Asdreni” në Pejë kanë vendosur të vizitojnë kompleksin memorial “Adem Jashari” në Prekaz.
E emocionet që po i përjetojnë janë të forta.
“Për këtë vend e dimë që është një vend që bartë shumë emocione secili turist që vjen këtu, normalisht se Prekazi është një vend shumë i shenjtë për gjithë shqiptarët dhe ka vlera shumë të veçanta”, ka thënë Bertina Beqiraj – nxënëse e shkollës fillore “Asdreni” në Pejë.
Drejtoresha e kësaj shkolle Agime Lajçi, thotë se këtë aktivitet e organizojnë çdo vit.
“Ne si institucion arsimor e organizojmë aktivitetin në kuadër të fushës korrikulare “Shoqëria dhe mjedisi” në kuadër të punës së palodhshme që e bëjnë mësimdhënësit dhe në kuadër të asaj që përveç pjesës teorike edhe pjesën praktike të realizojmë dhe për së afërmi nxënësit ti sjellim në Prekaz të kuptojnë nga afër për historinë e lavdishme të familjes Jashari dhe të kuptojnë për këtë proces kaq të rëndësishëm për lirinë që ne sot e gëzojmë falë gjakut tyre dhe falë sakrificës të çdo luftëtari dhe çdo familje që kanë rënë për lirinë dhe pavarësinë e Kosovës”, ka deklaruar ajo.
E për herë të parë, Prekazin po e viziton një qytetar nga Shkodra.
“Gjithkush që do të kuptojë luftën në Kosovë duhet të vizitojë Prekazin, pa e parë Prekazin nuk kuptohet lufta në Kosovë. Vlera e lirisë është paguar kaq shtrenjtë, vlera e lirisë më ka bërë për me ardh me pa, rreshtin e varrezave sa janë, të krijon një trishtim në moment që hynë të krijohet një trishtim”, ka pohuar Arben Hysaj – vizitor nga Shkodra.
Sipas të dhënave për televizionin nga ciceroni, u bë e ditur se vetëm këtë vit Prekazin e kanë vizituar më shumë se gjysmë milion qytetarë, kurse që pas luftës është vizituar nga rreth 16 milionë vizitorë.
