Kandidati i Lëvizjes Vetëvendosje për kryetar të Fushë-Kosovës, Valon Prebreza, ka kritikuar qeverisjen 25-vjeçare të Burim Berishës nga radhët e LDK-së.
Prebreza, qeverisjen e Berishës, e ka cilësuar periudhën e fundit të mandatit të tij si më të dobëtën në historinë e komunës.
Sipas Prebrezës, ndonëse në fillimet e para të qeverisjes komunale janë realizuar disa projekte bazike, sidomos në zonat rurale, gjatë viteve të fundit nuk është bërë asnjë investim domethënës për zhvillimin e komunës.
“Një kryetar në pushtet mbi 20 vite, nuk është që s’ka bërë edhe ndonjë punë të mirë. Se në një kohë me jetu në Fushë-Kosovë ke pas problem edhe të rrugëve nëpër fshatra, por ajo kohë ka kaluar qysh nga viti 2012. Për atë periudhë, pra në dy mandatet e para, nuk është që s’është punuar në Fushë-Kosovë, sidomos në fshatra – për rregullimi e rrugëve, ndriçimin publik, pavarësisht që edhe ai ndriçim i ka të metat e veta, sepse kanë bërë eksperimente me të. Mirëpo, s’është që s’kanë punuar në dy mandatet e para, mirëpo në këto dy mandatet e fundit tri punë të mira nuk i gjen në Fushë-Kosovë, ta them me kompetencë të plotë”, deklaroi Prebreza në “Këndin e Debatit” në Tëvë1.
