Një person është arrestuar në fshatin Jahoc të Gjakovës pas një kontrolli policor në shtëpinë e tij, ku janë gjetur armë dhe fishekë. Ngjarja ka ndodhur mëngjesin e së enjtes, ka bërë të ditur Policia e Kosovës përmes raportit 24-orësh.
Sipas njoftimit, gjatë bastisjes në shtëpinë e të dyshuarit, policia ka sekuestruar një pistoletë me dy karikatorë, si dhe 92 fishekë dhe 10 fishekë me gaz.
“Është arrestuar i dyshuari mashkull kosovar pasi që gjatë kontrollit të shtëpisë së tij i është gjetur dhe sekuestruar një pistoletë me dy karikatorë, 92 fishekë dhe 10 fishekë me gaz”, thuhet në raportin e Policisë së Kosovës.
Pas përfundimit të procedurave të para hetimore, me urdhër të prokurorit kompetent, i dyshuari është liruar në procedurë të rregullt.
“Me vendim të prokurorit, pas intervistimit i dyshuari është liruar dhe rasti shkon në procedurë të rregullt”, ka sqaruar policia.
Rasti është cilësuar si “Mbajtje në pronësi, kontroll ose posedim të paautorizuar të armëve”, dhe hetimet për këtë ngjarje po vazhdojnë nga njësitë përkatëse policore në koordinim me Prokurorinë Themelore të Gjakovës.
