Analisti politik, Xhevdet Pozhari ka thënë se dita e sotme është vetëm fillimi kur Forca e Sigurisë së Kosovës (FSK) do të shkojë haptazi në veri, sa herë të ketë nevojë për ndihmën e tyre ‘pa ngarkesën se mund të shkaktohet ndonjë trazirë’
Përmes një postimi në Facebook, Pozhari ka theksuar se kjo prani do të bëhet e zakonshme, ngaqë sipas tij, situata në veri të Kosovës tashmë ka ndryshuar.
Postimi i plotë
Thanë, ka qenë FSK-ja edhe dy herë më parë në veri.
Po! Kanë qenë me kostume të zhytjes. Pa simbole. Kjo për faktin se grupet krim*nale operonin në veri, të armatosur deri në dhëmbë dhe mezi kanë pritur që të shkaktojnë trazira.
E, tash kanë shkuar me uniformë. Me autoblinda. Me krejt pajisjet e duhura. Haptazi. Kjo ngaqë KFOR-i e din se më veriu nuk është nën kontrollin e grupeve kri*m*nale, ter*or*ste.
Ky është dallimi!
Ky është veç fillimi kur FSK do të shkojë haptazi në veri, sa herë të ketë nevojë për ndihmën e tyre, pa ngarkesën se mund të shkaktohet ndonjë trazirë. Ngaqë ka ndryshuar gjendja në terren.
Prandaj gjithë kjo zhurmë që mos të kuptohet ky realitet kaq i thjeshtë.
Ndryshe, ekipi i FSK-së, të martën nxori trupin e pajetë të një mërgimtari, i cili ishte hedhur të dielën në Liqenin e Ujmanit dhe nuk doli.
Lëvizja Vetëvendosje, në një postim në Facebook, kishte shkruar se “FSK-ja për herë të parë si ushtri në veri të vendit”, ndërsa kishte përcjellë me foto pamje të ekipit të FSK-së si dhe deklaratën e ministrit të Mbrojtjes në detyrë Ejup Maqedonci.
Ndërkaq, ambasada e Gjermanisë në Kosovë, përmes një komunikate për media, ka shprehur shqetësimin e thellë ndaj përpjekjeve për ta politizuar zbarkimin e sotëm të një ekipi të kërkim-shpëtimit të Forcës së Sigurisë së Kosovës në Liqenin e Ujmanit.
