Analisti politik, Xhevedet Pozhari ka vlerësuar se kryetari i Lidhjes Demokratike të Kosovës (LDK), Lumir Abdixhiku, po tenton të shpëtojë pozicionin e tij politik duke zhvendosur debatin brenda grupeve të partisë.
Sipas Pozharit, nëse Abdixhiku do të ishte realisht i shqetësuar për manipulimin e votave, do të kishte reaguar më herët, konkretisht më 9 shkurt, kur kjo çështje ishte ngritur si shqetësim nga disa deputetë të LDK-së.
“Lumir Abdixhiku është duke u munduar që ta shpëtojë lëkurën e tij politike duke e zhvendosur debatin midis grupeve. Nga kërkesa për dorëheqje tash po kërkon votëbesim. Nuk është se është brengosur aq shumë për votat, sepse po të ishte kështu, do ta kishte ndjekur këtë shqetësim që në momentin kur u ngrit nga Arben Gashi dhe Avdullah Hoti në grupin ‘Votat e mërgatës’”, ka deklaruar Pozhari.
Pozhari ka përmendur edhe ndarjet brenda LDK-së, duke përmendur emra të figurave partiake dhe duke theksuar se disa prej tyre janë prurje të kohës së Abdixhikut, të cilat, sipas tij, kanë pasur deklarata të kontestuara në të kaluarën.
“Tani, kur e ka të rrezikuar karrigen, po mundohet të nisë betejat e tij me grupet brenda partisë. Për shembull, nëse Driton Selmanaj është pjesë e një grupi tjetër, por Visar Azemi është prurje e kohës së Abdixhikut dhe mbahet mend për deklaratën se ‘Banjska ka qenë incident i izoluar’”, ka thënë Pozhari.
