Paneli Zgjedhor për Ankesa dhe Parashtresa ka anuluar vendimin e Komisionit Qendror të Zgjedhjeve për moscertifikimin e Listës Serbe në zgjedhjet lokale të 12 tetorit të 2025-ës.
Vendimi i PZAP-it është dorëzuar në KQZ, ndërsa palët kanë të drejtë ankese në Gjykatën Supreme brenda afatit ligjor prej 48 orësh.
Zëdhënësi i KQZ-së, Valmir Elezi, ka konfirmuar për tëvë1.info se do të presë derisa vendimi i PZAP-it të marrë formën e prerë.
“Komisioni Qendror i Zgjedhjeve ka pranuar vendimin e Panelit Zgjedhor për Ankesa dhe Parashtresa lidhur me ankesën e paraqitur në këtë institucion. Ndaj këtij vendimi, palët kanë të drejtë ankese në Gjykatën Supreme brenda 48 orëve. KQZ do të presë që vendimi të marrë formën e prerë,” deklaroi Elezi.
E për këtë ka reaguar analisti, Xhevdet Pozhari duke e krahasuar me rastin e vitit 2021, kur Albin Kurti nuk u lejua fillimisht të kandidojë për shkak të një vendimi gjyqësor.
“Po del puna që më lehtë ka qenë mos me e certifikua Albin Kurtin në 2021-tën sesa Listën Serbe në 2025-tën. Marrë,” ka shkruar Pozhari në Facebook.
