Analisti politik Xhevdet Pozhari ka deklaruar se Partia Demokratike e Kosovës (PDK) dhe Lidhja Demokratike e Kosovës (LDK) tashmë kanë një “marrëveshje të heshtur” për koalicione në mënyrë që të dalin fituese në balotazhin e 9 nëntorit.
Në emisionin “Këndi i Debatit” në Tëvë1, Pozhari tha se bashkëpunimi publik i LDK-së dhe PDK-së në Gjilan tregon qartë afrimin mes dy partive, ndërsa mungesa e reagimeve nga kryesia e LDK-së e vërteton këtë.
Ai tha se reagime të ngjashme nuk ka pasur për koalicionin mes LDK-së e VV-së në Vushtrri.
“Ne e pamë që LDK e PDK e bënë publik bashkëpunimin në Gjilan, nuk patë reagime histerike nga ana e kryesisë së LDK-së edhe pse ishte publike, ndërkohë që një gjë e tillë u përcoll me shumë kundërshtime dhe me shumë polimika që kemi qenë dëshmitarë në rastin kur LDK bëri koalicion lokal me LVV-në në Vushtrri. Pra, shihet se këto dy parti e kanë një marrëveshje të heshtur, ndonëse kryetari i kësaj partie, Abdixhiku thotë se ‘unë nuk bëj marrëveshje nën tavolina, mbi tavolina, dal deklarohem haptazi’, nuk e shoh që në rastin konkret, flet haptazi se ka një preferencë të koalicionit me PDK-në”, deklaroi ai.
Sipas tij, ndonëse kryetari i LDK-së, Lumir Abdixhiku, thotë se nuk bën marrëveshje “nën apo mbi tavolina”, veprimet e fundit tregojnë të kundërtën.
“Nëse është shumë më tolerant, shumë më i kuptueshëm për koalicionet që partia e tij i lidh me komunat e ndryshme, ku bashkëpunon me PDK-në kundër LVV-së, duhet ta thotë haptazi. Sepse, tek fundit opozita është për të formuar kauza”, deklaroi Pozhari.
