Analisti politik Xhevdet Pozhari ka komentuar zhvillimet rreth procesit të zgjedhjes së presidentit, duke sugjeruar se nëse situata aktuale vazhdon, zgjidhja më e mirë do të ishte që presidenti të zgjidhet drejtpërdrejt nga qytetarët.
Duke folur në emisionin “Këndi i debatit” në Tëvë1, Pozhari u ndal te dështimi i disa seancave gjatë ditës për zgjedhjen e presidentit, ndërsa një tjetër është paralajmëruar për orën 23:00.
Sipas tij, mungesa e konsensusit politik po e zvarrit procesin dhe po e bën të pamundur arritjen e një marrëveshjeje.
“Në këto rrethana, më tepër po dominojnë inatet sesa një mirëkuptim mes partive politike dhe mendoj se këtu është thelbi i problemit. E kemi diskutuar edhe më herët që nëse vazhdohet kështu pafundësisht, atëherë më së miri është që zgjedhja e presidentit t’u lihet në dorë qytetarëve, dhe të bëhen edhe ndryshimet e nevojshme kushtetuese”, u shpreh Pozhari.
Ai theksoi se kriza aktuale politike kërkon zgjidhje më gjithëpërfshirëse, në mënyrë që të shmangen bllokadat e vazhdueshme institucionale.
