Konsulenti politik, Xhevdet Pozhari, në emisionin “Këndi i debatit” në Tevë, ka komentuar fitoren pa balotazh të Ramiz Lladrovcit në Drenas, duke e cilësuar atë si një nga goditjet më të mëdha politike për Partinë Demokratike të Kosovës.
“Këtë fitore pa balotazh, Lladrovci ia dha debaklin më të madh elektoral PDK-së që nga paslufta, në zgjedhjet lokale. Definitivisht për mendimin tim, sepse është një situatë komplekse. Nuk është se e kemi parë shpesh një rast ku kandidati i një partie ka dëshirë të garojë, i ka sukseset që i ka numëruar edhe këtu në studio suksese që janë pranuar, në një mënyrë apo tjetër, edhe nga vetë partia – por që megjithatë është penalizuar nga disa duar në kryesi,” ka deklaruar Pozhari.
Ai shtoi se përkrahja që Lladrovci ka marrë në Drenas është e jashtëzakonshme, duke e krahasuar edhe me ish-figura të fuqishme të PDK-së në atë zonë.
“Lladrovci, me përkrahjen që ka në Drenas, e ka kaluar edhe Sami Lushtakun me vota ku ia thoshte që unë po garoj kundër bedelit të tij,” është shprehur më tej Pozhari.
Sipas tij, rezultati në Drenas tregon jo vetëm fuqinë lokale të Lladrovcit, por edhe përçarjet e brendshme në PDK, të cilat, siç u tha në emision, po i kushtojnë partisë në nivel lokal dhe qendror.
