Votuesit portugezë iu drejtuan kutive të votimit të dielën për të tretat zgjedhje të përgjithshme në tre vjet, mes një peizazhi politik gjithnjë e më të fragmentuar dhe paqëndrueshmërie të thellë.
Zgjedhjet pritet të mos sjellin shumicë të qartë, duke e lënë vendin në të njëjtën situatë politike të pasigurt.
Dy partitë tradicionale – Partia Socialiste (e majtë) dhe Social Demokratët (e djathtë-qendër) – pritet të mbeten forcat kryesore, por sondazhet sugjerojnë se asnjëra nuk do të arrijë shumicën në parlamentin me 230 vende. Kjo do të kërkojë negociata të reja për formimin e një qeverie, potencialisht sërish minoritare.
Zgjedhjet u thirrën pas rrëzimit të qeverisë së qendrës së djathtë në mars, përmes një votëbesimi të humbur, pas më pak se një viti në pushtet. Kryeministri aktual Luis Montenegro përballet me akuza për konflikt interesi, të cilat ai i mohon, raporton AP.
Partia e ekstremit të djathtë, Chega, ka njohur rritje të shpejtë, duke shfrytëzuar pakënaqësinë publike ndaj korrupsionit dhe kërkesat për masa më të ashpra ndaj imigracionit. Megjithatë, ajo është përfshirë vetë në skandale që kanë ulur besueshmërinë.
Ndërkohë, vendi përballet me kriza të mëdha sociale. Imigracioni është trefishuar që nga viti 2018, ndërsa çmimet e banesave dhe qiratë kanë arritur nivele rekord, duke e bërë të papërballueshme jetesën për shumë qytetarë në një nga vendet më të varfra të Evropës Perëndimore.
Pagat mbeten të ulëta krahasuar me standardet evropiane, me një mesatare mujore prej 1,200 eurosh, ndërsa qiratë në Lisbonë u rritën me më shumë se 7% vitin e kaluar – niveli më i lartë në 30 vjet.
Rezultatet paraprake të zgjedhjeve priten gjatë natës, ndërsa mbetet e paqartë nëse Portugalia do të arrijë më në fund një stabilitet të qëndrueshëm politik.
