Portieri i Kosovës, Visar Bekaj është vlerësuar lart për paraqitjen e tij te Hatayspori, duke zënë vend në formacionin më të mirë të javës në Turqi.
Bekaj është përfshirë në ekipin më të mirë për xhiron e 24-të, pasi ishte vendimtar në fitoren e ekipit të tij kundër Alanyasporit.
Hatayspori fitoi 1:0 kurse Bekaj e mbajti portën të paprekur pasi bëri 4 pritje vendimtare, përpara se të ndëshkohet me karton të verdhë në fund të takimit.
Për 27-vjeçarin, kjo është ndeshja e tretë rresht që është startues te Hatayspori kurse deri më tani ka vetëm katër paraqitje në elitën e futbollit turk.
Në total, Bekaj ka 7 ndeshje të luajtura deri më tani për Hataysporin, ekip me të cilin ka kontratë deri në verën e vitit të ardhshëm.
Aktualisht, Hatayspori është i parafundit në tabelë dhe po lufton për të siguruar mbijetesën në Superligën e Turqisë.
