Populiste i ka quajtur Partia Demokratike e Kosovës (PDK), shpërndarjen e parasë publike, duke iu referuar ndarjes së mjeteve nga Qeveria për subvencionimin e energjisë e masa të tjera.
Ndërsa, njohësi i rrethanave ekonomike në vend, Erton Bega, i quan metoda për të përfituar elektoralisht.
Deputeti i PDK-së, Ferat Shala, ka shprehur kritikën e tij për mënyrën se si po shpërndahen mjetet.
“Do duhej dhe është koha e fundit që Qeveria të reflektojë sa i përket çështjes së menaxhimit të parasë publike dhe po shpresoj dhe besoj që ky vit nuk do duhej që Qeverisë në portofolin e saj t’i zë suficit siç ishte vitin e kaluar me 700 milionë euro. Kërkoj nga Qeveria që të jetë shumë më azhure në investime kapitale dhe në dinamiken e realizimit të investimeve kapitale”, thotë Shala.
Shala është skeptik se Qeveria Kurti do të ndryshojë mënyrën e qeverisjes, e sidomos në çështje ekonomike.
“Fatkeqësisht është duke mbijetuar me anë të krizave, fatkeqësisht është duke mbijetuar me anë të hapjes së problematikave diplomatike, krizave të sigurisë apo duke sulmuar mediet apo aferat tjera dhe fatkeqësisht ne kemi shpërfaqje të një keqqeverisje dhe në kuptimin e keqpërdorimit klasik financiar, duke llogaritur rezervat shtetërore, krizën energjetike, aferat tjera korruptive e kështu më radhë”.
Ndërsa, njohësi i rrethanave ekonomike në vend, Erton Bega, i ka quajtur populliste masat e marra së fundi nga Qeveria për subvencionimin e faturave të energjisë eklektike për grupe të caktuara shoqërore.
“Qeveria duhet të jetë shumë e kujdesshme në ndarjen e subvencioneve për energjinë elektrik, pasi që masat e fundit të cilat i kanë ndërmarrë për subvencionimin çoftë të pajisjeve, supozohet që kanë shpenzime më të ulëta të energjisë eklektike, më shumë më duken si masa populliste sesa që do të kenë efekt në uljen e konsumit të energjisë elektrike, në anën tjetër kemi tash edhe masën e fundit e cila ka të bëjë me subvencionimin e faturave të energjisë elektikrike për grupet shoqërore të cilat kanë të hyra më pak se 150 euro, për anëtar të familjes”, tha Bega për EO.
Begaj tha se kjo do të ndikojë negativisht edhe në tregun e punës, sepse shumë punëtorë do të punojnë joformalisht për të përfituar edhe nga subvencionet.
“Masat qeveritare që ndërmerren në çdo fushë kanë ndikim të drejtpërdrejtë në jetën e qytetarit, për rrjedhojë mund të kenë edhe ndikim në mirëmbajtjen e grupeve të interesit që kemi të bëjmë më interesat e partive politike për tu mbajtur votat dhe për të përfituar elektoralisht”, tha ai.
