Polonia dhe tre vendet baltike thanë të martën se duan të tërhiqen nga një konventë ndërkombëtare që ndalon minat tokësore kundër personelit për shkak të kërcënimit në rritje nga Rusia ndaj shteteve të vijës së parë të NATO-s.
Ministrat e mbrojtjes të Polonisë, Lituanisë, Letonisë dhe Estonisë thanë në një deklaratë të përbashkët se ata “njëzëri rekomandojnë tërheqjen nga Konventa e Otavës” – konventa ndërkombëtare për ndalimin e minave kundër personelit që hyri në fuqi në 1999, raporton AP.
Ata argumentojnë se situata e sigurisë përgjatë krahut lindor të NATO-s është “përkeqësuar thelbësisht” që kur ata nënshkruan Konventën e Ndalimit të Minave Kundër Personelit dhe se “kërcënimet ushtarake ndaj vendeve anëtare të NATO-s në kufi me Rusinë dhe Bjellorusinë janë rritur ndjeshëm”.
“Me këtë vendim ne po dërgojmë një mesazh të qartë: Vendet tona janë të përgatitura dhe mund të përdorin çdo masë të nevojshme për të mbrojtur territorin dhe lirinë tonë”, shkruan ata.
Konventa e Otavës u nënshkrua në 1997 dhe hyri në fuqi në 1999. Gati tre duzina vende nuk kanë aderuar në të, duke përfshirë disa prodhues dhe përdorues kryesorë aktualë dhe të kaluar të minave tokësore si Shtetet e Bashkuara, Kina, India, Pakistani, Koreja e Jugut dhe Rusia.
