Organizatat myslimane në Holandë kanë ngritur të hënën një padi kundër politikanit holandez të ekstremit të djathtë, Geert Wilders për nxitje të dyshuar të urrejtjes, diskriminimit dhe dhunës kundër myslimanëve.
Ky veprim vjen pasi Wilders postoi një imazh në X javën e kaluar ku e përshkruante një grua bjonde si “të mirë” dhe një grua me shami si “të keqe”, gjë që kritikët thonë se nxit ndjenjat anti-muslimane.
Në një postim në Facebook, Muslim Rights Watch, një nga 14 organizatat myslimane që ndjekin veprime ligjore, deklaroi se ky imazh i ngjan shumë përshkrimeve të hebrenjve nga Gjermania naziste si “çnjerëzorë, kërcënues dhe të padëshiruar”.
Grupi thotë se portretizimi i gruas me shami si “e keqe” nga Geert Wilders mund të përbëjë nxitje të armiqësisë, trazirave sociale, fyerjes dhe urrejtjes si bazë ligjore për veprim.
“Myslimanët janë një pjesë e pandashme e Holandës. Ne jetojmë këtu, studiojmë këtu, punojmë këtu dhe kontribuojmë në shoqërinë tonë çdo ditë. Ne nuk mund dhe nuk duhet ta shmangim shikimin”, shtoi ajo./teve1/
