Në prag të zgjedhje të jashtëzakonshme ne katër komunat veriore, politikanët serb i bëjnë thirrje qytetarëve që të dalin dhe të votojnë. Ata shpresojnë që zgjedhjet e 23 Prillit do të jenë të qeta dhe pa tensione.
Zgjedhjet e jashtëzakonshme ne katër komunat veriore do të mbahen me 23 Prill.
Partia kryesore e serbëve ne Kosovë, Lista Serbe, e cila e ka mbështetjen e Beogradit zyrtar nuk do të marrë pjesë në këto zgjedhje.
Prej 11 kandidatëve nga katër subjekte politike që do të marrin pjesë në zgjedhje vetëm dy janë të komunitetit serb, Aleksandar Jabllanoviq nga Partia e Serbëve të Kosovës dhe kandidatja e pavarur Sladana Pantoviq.
Kjo e fundit, thotë se qytetarët në veri të vendit e kanë kuptuar se Lista Serbe nuk shqetësohet për ta, prandaj ajo ka bërë thirrje për reflektim.
“Qytetarët janë te frikësuar, mirëpo edhe e kanë kuptuar se nuk ka asgjë nga Lista Serbe, ata janë dobësuar. Mendoj se do të ketë vetëdijesim tek qytetarët sepse e kanë parë se çfarë ka ndodhur. Ishin në presion për të dhënë dorëheqje dhe tash askush nuk përkujdeset për ta. Lista Serbe ka qenë një parti profitabile që i shikonte vetëm interesat e veta, ndërsa populli është varfëruar skajshmërisht. Me ardhjen e Kurtit janë bërë disa ndryshime pozitive, i besoj me shumë atij se kujtdo tjetër pavarësisht se çfarë thonë njerëzit për të. Që nga ardhja e Kurtit ka rënë dukshëm ndikimi i Listës Serbe”, ka thënë për Tëvë 1 Pantoviq.
Kurse, Andrija Ignjatoviq, nga partia e serbeve të Kosovës, shpreson se nuk do ketë tensione të dielën.
“Shpresoj shumë që këto zgjedhje do të shërbejnë si zgjidhje e problemeve dhe nuk do të ketë tensione. Natyrisht që situata në veri është e ndjeshme dhe mund të ndryshojë brenda natës por barrikadat asnjëherë nuk do të jenë zgjidhje. Megjithatë në dy komunat ku nuk ka kandidat serb nuk pres që të dalin serbet për të votuar”, shprehet Ignjatoviq.
E për kryesuesin e Kuvendit Komunal të Mitrovicës Veriore, Nedzad Ugljanin, vetëm një votë e lirë është me legjitime se mijëra vota te Listës Serbe.
“Sa i përket legjitimitetit, edhe vetëm një vote e lire është me legjitime se mijëra vota te Listës Serbe, te cilët i kane frikësuar njerëzit. Ato mijëra vota nuk janë legjitime dhe ai proces nuk është legjitim”, ka thënë ai.
Zgjedhjet ishin paraparë të mbaheshin dhjetorin e kaluar, por për shkak incidenteve dhe tensioneve ato u shtynë.
Kronika e realizuar nga gazetari Shpat Blakçori
