U nis drejt Prishtinës, për ta takuar ambasadorin amerikan, Jeff Hovenier.
Por, koha sa planifikoi që i nevojitej për të ardhur në kryeqytetin kosovar, nuk i doli e saktë, politikanes serbe, Rada Trajkoviq.
Ajo nuk u lejua nga policia serbe të hyjë në territorin e Kosovës –në pikën kufitare në Merdare.
Pas disa orë pritje, më në fund arriti të hyjë në Kosovë.
Mirëpo, i njëjti problem i doli edhe gjatë kthimit për në Serbi.
Trajkoviq u ndalua sërish.
Ajo u mbajt gjatë gjithë natës mes të enjtes dhe të premtes në zonën administrative të kufirit Kosovë-Serbi.
Derisa po mbahej e ndaluar, Trajkoviq vazhdimisht shkruante në rrjetin social “Twitter”.
Tregonte për gjendjen e rënduar shëndetësore.
“Gjithë natën, në mes të dimrit, në makinë. Dokumentet e konfiskuara, pa komunikim. A do të reagojë dikush ndaj kësaj torture?”, ka shkruar ajo.
Pak orë më herët, Trajkoviq njoftoi se ministri të cilin ajo e këshillon, Nenad Rashiq, do t’i çonte ilaçe dhe ujë nga Prishtina.
Ministri për Komunitete dhe Kthim theksoi se me ardhjen e krerëve të rinj të Agjencisë BIA do të jetë një doktrinë e re për ata që kanë mendim ndryshe nga regjimi aktual i Serbisë.
“Një rast i turpshëm ndaljen e gruas që ka sëmundjen e diabetit dhe është e mëshuar dhe tani është duke kaluar një periudhë shumë të vështirë ka sëmundjen e diabetit asaj i nevojitet rregullisht insulina dhe falënderoj policinë kufitare e cila jo vetëm që ka mundësuar ujë dhe kanë shkuar në Podujevë dhe kanë blerë insulinën”, tha Rashiq.
E për ndalimin e Rada Trajkoviqit shprehur keqardhje edhe kryeministri i Kosovës, Albin Kurti
“Edhe mua më vjen shumë keq që jemi në një situatë të tillë…do të mund të shoh se çka mund të bëjë sot paradite që zonja Trajkoviq të hyjë në Kosovë”, ka thwnw ai.
Kryediplomatja Donika Gërvalla thotë se për këtë situatë e ka njoftuar zyrën e BE-së.
“Përmes zyrës sonë në Beograd kemi ndërmarrë të gjithë hapat zyrtar për informimin e Zyrës së BE-së e cila në njëfarë mënyre është njëfarë garance për lëvizjen e lirë të qytetarëve të Kosovës brenda BE-së”, shtoi ajo.
Trajkoviq ka mbajtur për shumë mandate pozitën e deputetes së Kuvendit të Kosovës.
Ndryshe, ajo njihet si njëra ndër kritiket më të ashpra të presidentit të Serbisë, Aleksandër Vuçiq.
Kronikë e realizuar nga gazetari, Arton Rama
