Qeveria shqiptare, nën drejtimin e kryeministrit Edi Rama, ka njoftuar një plan ambicioz për të eliminuar paratë e gatshme nga ekonomia e vendit deri në vitin 2030, ka shkruar gazeta Politico.
Sipas tij, iniciativa synon të adresojë informalitetin e përhapur dhe të zvogëlojë qarkullimin e parave të paligjshme brenda sistemit financiar.
Në Shqipëri vazhdon të ekzistojë një varësi e gjatë nga paratë e gatshme, me shumë qytetarë që preferojnë t’i ruajnë paratë privatisht në vend që të përdorin kanalet formale bankare.
Sipas Shoqatës Shqiptare të Bankave, vetëm 34 përqind e popullsisë shpreh besim te bankat, dhe të dhënat e Bankës Botërore tregojnë se më pak se 50 përqind e shqiptarëve kanë një llogari bankare.
Ekonomia informale, ose “gri” e vendit — e përbërë nga transaksione të paraportuara dhe të pataksuara — vlerësohet të përbëjë midis 29 dhe 50 përqind të produktit të brendshëm bruto (PBB).
Për të mbështetur tranzicionin, autoritetet po hartojnë një plan gjithëpërfshirës. Masat kryesore përfshijnë vendosjen e kufizimeve në transaksionet me para në dorë, integrimin e Shqipërisë në Zonën e Vetme të Pagesave në Euro të Bashkimit Evropian (SEPA) deri në tetor 2025 dhe zbatimin e sistemeve të pagesave të menjëhershme SEPA menjëherë pas kësaj.
Sipas Spiro Brumbullit, Sekretarit të Përgjithshëm të Shoqatës së Bankave Shqiptare, këto hapa janë pjesë e një përpjekjeje më të gjerë për modernizimin e sistemit financiar dhe përafrimin e tij me standardet e BE-së.
Qeveria dhe institucionet përkatëse pritet të vazhdojnë të punojnë mbi politikat që promovojnë transparencën, përfshirjen financiare dhe infrastrukturën e pagesave dixhitale.
Nëse do të ketë sukses, Shqipëria do të bëhet vendi i parë në botë që do të eliminojë plotësisht përdorimin e parave të gatshme në ekonominë e saj./teve1/
