Policia e Kosovës ka bërë të ditur se rasti i raportuar si rrëmbim dy ditë më parë në Fushë – Kosovës, ka rezultuar të jetë i rremë.
Më 21 maj ishte raportuar se një e mitur në rrugën “Pajazit Islami” në Fushë – Kosovë është futur me forcë në një veturë nga disa persona dhe se nëna e vajzës ishte lënduar duke tentuar t’i ndalojë.
Por, policia ka bërë të ditur se pas hetimeve është konfirmuar se nuk ka pasur rrëmbim të vërtetë.
“Si rezultat i hetimeve intensive, veprimeve të koordinuara policore, analizave të detajuara, si dhe verifikimeve të kryera, është arritur të konfirmohet se nuk ka pasur asnjë rrëmbim të vërtetë, por kemi të bëjmë me një kallëzim të rremë. Policia në bashkëpunim të plotë me prokurorin e shtetit, është duke vazhduar ndërmarrjen e të gjitha veprimeve hetimore me qëllim të zbardhjes së plotë të rrethanave dhe përgjegjësive ligjore që dalin nga ky rast”, thuhet nga Policia e Kosovës.
Një e mitur futet me forcë në një veturë nga disa persona, lirohet pas një ore
